CLUB LECTURA XANEIRO

 Hoxe xuntámonos de novo no club de lectura. No grupo de 3º e 4º ESO comentaron La foto de los mil me gusta, de Nando López, unha obra de teatro fresca e actual. En primeiro de ESO comentamos as lecturas que levamos para o Nada de escolla propia. Títulos como O neno do pixama de raias, Crónicas la torre ou Mitos griegos ou Pulsaciones espertaron a curiosidade nos membros do grupo que non as leran para coñecelas. Para o próximo encontro leremos La foto de los mil me gusta. Deixamos unha fotiño do encontro. Agardámosvos na biblio!!!💚

PASIÑO A PASIÑO NO NOSO NOVO ESPAZO

 Pouco a pouco seguimos dando forma ao novo espazo da biblioteca. Máis amplitude, máis luz e novas lecturas e xogos. Nos recreos o noso alumnado comparte xogos, club manga, partidas de xadrez e  intercambian opinións sobre lecturas. Temos agora unha biblio moito máis dinámica e acolledora: Aínda queda moito por facer porén continuamos a traballar para seguir mellorando cada curso. Aquí vos agardamos!!!! 💓📗

 Vede que ben está quedando:

Concurso de postais de Nadal

 Antes de gozar das nosas vacacións de Nadal, organizamos dende a biblioteca un concurso de postais para que o noso alumnado demostrase a súa creatividade unindo os motivos de Nadal cos motivos literarios. O resultado foi o que aquí vos mostramos. Damos as grazas a todos e todas os que participastes e os nosos parbéns ás tres gañadoras!!! ✨

Club de lectura decembro

 O luns19 de decembro, para rematar as sesións deste trimestre do club de lectura, reunímonos de novo para ler e comentar a obra de banda deseñada TAM. Fixemos a lectura compartida e logo intercambiamos opinións. Gustounos esta banda deseñada escrita por Anémona de Río, pseudónimo de Aldara Álvarez García, Vigo, 1995. Gustoulle debuxar dende sempre pero nunca o contemplou como unha profesión ata que en 2013 entrou na escola de cómic e banda deseñada O Garaxe Hermético, onde participou en dous álbums: 221BD e Verne imaxinado. O seu proxecto Tam gañou o Premio Fin de Curso e foi publicado por Retranca Editora. Durante estes anos tamén realizou varias tiras cómicas para o Diario de Pontevedra. En 2019, gañou o I Premio de Banda Deseñada O Garaxe Hermético con A proba de auga. Actualmente dedícase a facer encargos personalizados. Pódense atopar máis mostras do seu traballo en Instagram e Twitter en @anemonaderio.

Aquí vos deixamos unhas fotiños da sesión. 

O club de manga segue coas súas reunións semanais no recreo dos martes e coa súa participación no chat que temos na aula virtual destinado ao club. 

MÁRTIRES DE SOBREDO

EXPOSICIÓN DE FÓSILES

 O departamento de Bioloxía acháganos unha interesante mostra de fósiles para que poidamos coñecer máis sobre o desenvolvemento da vida. "Réplicas de fósiles e a súa era" aproxímanos ás diferentes etapas que conforman a evolución do planeta. 

25 NOVEMBRO: DÍA INTERNACIONAL CONTRA A VIOLENCIA DE XÉNERO

 Sumámonos á loita contra a eliminación da violencia de xénero. Todos e todas debemos camiñar na mesma dirección, no respecto e na igualdade real. Na biblioteca temos lecturas que nos farán reflexionar. 

Intervención vangardista do alumnado de Literatura Universal de 1º BACH

Deixamos aquí as fotos da intervención vangardista realizada polo alumnado de 1º BACH B na materia de Literatura Universal. 

Con eles e elas a creatividade voa!!!

TAMÉN LEN NOVEMBRO

 Onte, 26 de novembro, tivemos a nova edición do noso Tamén Len. Nesta ocasión recibimos a Adrián Salgado, coordinador de baloncesto en Salceda de Caselas. Algún alumnado coñéceo ben xa que aprende con el moitos dos valores no deporte e na vida que hoxe lles transmitiu. Presentounos o seu audio-libro A banda dos insectos, pasando a bóla que contén as cancións do grupo musical ao que el pertence. Grazas por unha amena conversa. 

Subcampións no concurso de regueifas de Valadares

 O día 7 de novembro o alumnado de 1º de BACH participou no Concurso de Regueifas celebrado no centro cultural de Valadares en Vigo. Previamente tivemos a Luís Caruncho impartíndolles un obradoiro no centro. Demostraron a súa valía competindo con outros centros da provincia de Pontevedra e obtendo o segundo premio. Á volta degustamos a enorme rosca que trouxeron de agasallo. 

Moitísimos parabéns aos nosos regueifeiros e regueifeiras!! 

MAGOSTO E SAMAÍN

 Malia que o mal tempo dos últimos días de outubro e primeiros de novemnro nos impediron realizar todas as actividades organizadas polo Equipo de Dinamización Lingüística co gallo do magosto e o Samaín si puidemos celebrar os tradicionais concursos de cabazas e receitas de outono. Tamén degustamos as sobremesas feitas polo alumnado con produtos de outono. Esperemos que o próximos curso o tempo nos permita realizar todas as actividades.

NOVIDADES LITERARIAS E NOVO ESPAZO DA BIBLIO

 Temos novas adquisicións para que poidades desfrutar coa lectura dos premios recentes:

E aquí vos vai unha mostra de como vai mudando o novo espazo que conforma agora a nosa biblio unha vez que remataron as obras e imos adquirindo mobiliario novo. Maior amplitude, máis luz e recunchos que iremos adaptando. 

NOVIDADES

O día 24 de outubro co gallo da celebración do día das bibliotecas, o equipo de dinamización lingüística realizou un programa de radio co alumnado de 4º ESO D sobre a figura que será homenaxeada o Día das Letras Galegas. Resultou moi interesante e o alumnado fíxoo realmente ben. Moitos parabéns. Deixamos o enlace a internet para que poidades velo: 

https://www.youtube.com/watch?v=BImV1lsfQd0

Neste mes celebramos unha nova sesión do club de lectura:

- no club manga seguen reuníndose semanalmente e, ademais de comentar Hanko Kun, aprenden moito de debuxo manga coas indicacións dalgunha das participantes no club: 

- no grupo de 1º de ESO comentamos este mes o libro Dúas bágoas por máquina, de Fina Casalderrey que nos transmitiu a importancia do amizade e do cariño entre humanos e animais: 

TAMÉN LEN

 Este mércores 22 de outubro temos unha nova edición da nosa clásica actividade de fomento da lectura: Tamén Len. Arrancamos o novo curso coa presenza de Pablo, o director do Colexio Altamira. Tamén está xa en marcha dende principios de outubro a Hora de ler, durante a cal profesorado e alumnado gozan dunha lectura silenciosa do seu agrado.💓

NOVO CURSO

 Arrancamos este novo curso coa nosa biblio en obras. Ampliouse o espazo de xeito que contamos cun lugar máis acolledor e lumninoso. Comezamos polo tanto o camiño este ano moi devagar ata que todo estea listo. Esperamos que vos guste e contamos coa vosa visita. 

Si arrancamos xa cos clubs de lectura. Continuamos co club de manga que amplia o número de integrantes e contamos con outros dous, un de 1º de ESO e outro de 3º e 4º. En 1º comezamos coa lectura de Trece avisos de Paula Carballeira para adentrarnos no mundo do sobrenatural de xeito entretido e ir así achegándonos ao noso Samaín e a cultura popular relacionada co medo. En cuarto escollemos unha obra breve pero moi intensa que nos fará reflexionar sobre a barbarie das guerras, Enderezo descoñecido de Kressman Taylor. As reunións de manga lévanse a cabo todos os martes no recreo e a primeira dos outros dous grupos foi este luns 20 de outubro. Queremos mostrarvos aquí a creatividade que amosan os membros do club manga xa que nesta primeira reunión, na que analizaron a saga Hanako Kun, crearon uns debuxos fantásticos que aquí vos mostramos.